Kan Tuanbia

             Dallas Fort Worth Area chung ah Laimi (Chinmi) kan hung karh chin lengmang tikah umkalnak (geographic) zoh in Dallas area (sang) i a um mi hi CBC Khrihfabu chung in sang then in rak i zohkhen a si. Khrihfabu kan um ahcun a tha tiah hruaitu hna nih an ruah i mipi zong nih ruahnak an lung a tling caah January 30, 2011 ni thawk in Dallas Chin Baptist Church tiah Dallas sang chung i a ummi hna nih Dallas Chin Batptist Church cu rak dirh a si. Ahmasa bik kan i pumh ah milu (229) kan si. New Port Landing i room ah kan i pum. Ahmai zarh cun Highland Oak Church of Christ Biakinn pi chung ah kum 6 chung kan i pum.

            Cu hnu in nikhat hnu nikhat, thlakhat hnu thlakhat, kumkhat hnu kumkhat, kan rung karhchin lengmang i 2015 ah cun member (900) leng kan hung phan. Kan Khrihfabu kan karh cang caah January 2014, general assembly hnatlaknak in, biakinn kawl kan thawk. Senior Pastor Rev. Ngun Awi le Building Committee Chairman Pu Simon Pengthang Cinzah kha tuanvo pek in kawl ter an si. 2015, May thla ah kan chungtel chuekhat cu Agape Baptist Church tiin inndang an chuak. DCBC cu Bawipa nih thlua a chuah caah a karh than lengmang i chungtel member (700) reng lo kan si cang.

            Restland thlanmual Gavirial Block cu Laimi tambik kan i vui nak kong ah thlanmual (21) cu July 14, 2015 ah $125,992.00- in kan cawk. Kan thihloh tikah lungre theih lo tein, kan biakinn pawng te a si fawn i, kan i fimhlawm kho lai tiah kan ruah. 2015, June thla ah Antioch Full Gospel Church of Dallas biakinn, 9850 Walnut Street, Dallas, Texas 75243 cu cawkding in Khrihfabu nih biakhiahnak kan rak ngei. Kum hnih le a cheu chung thla kan cam hnu le biakinn kan kawl hnu ah Pathian nih kan thlacamnak a kan leh. A hmun ekah (acres) 4.90 leng a kaumi biakinn cu Pathian lamhruainak le a hruaitu hna zuamnak thawng in August, 2016 ah $2.2 million in kan cawk khawh i August 7 ah Pathian sin pekchanhnak cu kan tuah. Kan building lakah pakhat a simi cu contract a rak um cang bantukin Richland Learning Academy kan hlanh hna caah kan biakinn hi community he zong pehtlaihnak fek ngai a ngeimi kan si.

            Chinmi tampi kan umnak Dallas city ah Pathian nih thluachuah a kan pekmi kan biakinn hmun hi hmailei ah Laimi dihlak nih Pathian riantuannak le miphun caah hman khawhmi center a si ding hi kan thlacamnak a si. 2017, July thla thawk in biakinn kauh le remh (renovation) kan thawk i November thla ah tlamtling tein kan lim. Hmailei zong ah kan biakinn hmun a lawng mi ah hall sak te dingin saduhthahnak kan ngei i Pathian sinah thla kan cam. DCBC hi vawlei hmunkip mi tampi sin ah Khrih thawngtha a chimtu, kan pawngkam community le vawlei ah hmual a ngeimi biatak a dirpitu khrihfabu a si nak hnga hi Pathian nih hmuitinh a kan pekmi cu a si. Na kan len caah kan i lawm.

DCBC