DCBC Thawhkehnak Tuanbia Tawi
DCBC cu January 30, 2011 ah Chin Baptist Church, TX in a chuakmi Khrihfabu a si. DCBC rak thawknak dingah a voikhatnak tonnak cu January 4, 2011 ah Pu Ceu Peng te inn ah Pu Ni Uk, Pu Ceu Peng le Pu Rokim Cinzah hna nih an rak ngei. A voihnihnak tonnak cuJanuary 8, 2011 ah Pu Ni Uk te inn ah tuah a si i minung (17) kan i tel kho. Cu tonnak i aa telmi hna cu; Pu Ceu Peng, Pu Rokim Cinzah, Pu Van Kam, Pu Laban Hlichal, Pu Thla Bik, Pu Lian Peng, Pu Dawt Cung, Pu Thawng Zel, Pu Pakung Bualhrin, Pu Lian Cung Thawng, Pu Ni Uk, Pu Sui Thang, Pu Thang Tu, Pu Van Ceu Lian, Pu Van Thang Lian, Pi Tial Tawi, Pi Dawt Thai hna kan rak si. Hi tonnak ah Khrihfabu dirh ding in lungtlinnak kan rak tuah. Cun Khrihfabu dirhpitu ding caah Rev. Ngun Awi le Saya Chan Hnin Thui cu January 9, 2011 ah sawm an rak si. A voithumnak tonnak cu Pu Chit Thui te inn ah upa (84) nih kan rak tuah tthan i Khrihfabu min caah Dallas Chin Baptist Church (DCBC) siseh tiah biakhiahnak kan rak ngei. Cuticun January 16, 2011 ah CBC sinah chuahnak nawlnak ca kan pek hna i January 30, 2011 ah Newport Landing Apartment office ah Rev. Ngun Awi hruainak in a voikhatnak DCBC pumnak cu kan rak tuah hna. A hmaizarh thawkin Highland Oak Church of Christ Biakinn pi ah kum (6) chung kan rak i pum.
Cuticun DCBC cu nikhat hnu nikhat, thlakhat hnu thlakhat, kumkhat hnu kumkhat, kan hun karh chin lengmang i 2015 ah cun chungtel (900) leng kan hun phan. Khrihfabu chungtel kan karh chin lengmang caah January 2014 ah tuahmi DCBC General Assembly ah Biakinn cawk ding in lungtlinnak kan rak tuah. Biakinn kawl dingah Senior Pastor Rev. Ngun Awi le Building Committee Chairman Pu Simon Pengthang Cinzah hna cu ttuanvo pek an rak si. Kum 2015, May thla ah DCBC chungtel cheukhat hna cu Agape Baptist Church tiin inndang an rak chuak.
DCBC cu Bawipa nih thluachuah a kan pek caah kan karh tthan lengmang i chungtel (700) reng lo kan hun si tthan. Kum hnih le a cheu chung thlacam buin biakinn kan kawl hnu ah Pathian nih kan thlacamnak a kan leh i June 2015 ah 9850 Walnut Street, Dallas, Texas 75243 ah a ummi Antioch Full Gospel Church of Dallas biakinn cu cawk dingin Khrihfabu nih biakhiahnak kan rak ngei. Cuticun a hmun ekah (acres) 4.90 leng a kaumi biakinn cu Pathian dawtnak le lamhruainak thawngin $2.2 million in kan cawk khawh i August 7, 2016 ah Pathian sinah pekchanhnak cu kan rak tuah. Biakinn kauhnak le remhnak cu July 2017 in kan thawk i November 2017 ah kan lim. February 3, 2019 ah DCBC chungtel cheukhat hna cu Calvary Chin Baptist Church ti in inndang an rak chuak tthan ve.
DCBC in inndang a chuakmi kan fale hna Agape Baptist Church (ABC) le Calvary Chin Baptist Church (CCBC) zong Pathian nih lam a hruai hna ti kan hmuh caah nulepa dirhmun in kan i lawm ngaingai. DCBC ah caantling pastor a rak ttuanmi hna cu: Rev. Ngun Awi (2011 – Present); Rev. Chan Hnin Thui (2011 - 2015); Rev. Dr. Roland Ceu (2014 - 2019); Rev. Daniel That Lian (2019- Present); Pastor David Cung Cin Thawng (2021- Present) an si.
Pathian nih DCBC cu lam a kan hruai i January 30, 2021 ah kum (10) tlin camtuak damtein kan phan kho. Nihin September 12, 2021, DCBC Tin Jubilee kan tuah ni le thla tiangah DCBC cu chungtel 550 leng kan hun phan tthan. Zeizong vialte hi amah Pathian dawtnak le lamhruainak thawng lawngte a si caah Pathian min kan thangtthat. Covid 19 pulhzawtnak ruangah a tikcu caan lioah kan DCBC Tin Jubilee kan tuah kho lo nain Pathian nih caan ttha a kan pek i nihin ah sunglawi tein kan tuah khawh caah Pathian min kan thangtthat. Pathian thluachuahnak tlamtling cu DCBC cungah le nan diklak cungah ni bang tlang sehlaw, ruah bang sur zungzal ko seh.
*DCBC Tuanbia Tawi TTialtu Hna: Pu Ni Uk, Pu Ceu Pen, Pu Van Ceu Lian
