Ngeihkhat duhnak hi zeiruang ah dah Sualnak dang he aa khah lo

Ngeihkhat Duhnak

Ngeihkha tduhnak (homosexuality) lawng hi 1 Korin 6:9-10 chungah a tialmi sualnak a si lo:

Mithalomi nih cun Pathian Pennak cu an co lai lo ti kha fiang tein nan hngalh ko. Nanmah le nanmah kha i hleng len hlah u; misual mi le siasal a biami le vacung pa duhmi le nu nih nu he sualnak, pa nih pa he sualnak a tuahmi le, mi thil a chutmi le hak a kuami le zu a rimi le mi congoih a hmangmi le mifir a simi hna nih cun Pathian Pennak cu an co lai lo.

Mah lawng hi sualnak a si a ti lo nain, a tu tiang ah cun, sualnak dang hna he a dang. A tu lio kan chan ah cun, sualnak a dang kan hmuhning he i khat loin, ngeikhatduhnak hi thilthar a si tiah kan pawngkam mi tampi nih lungtho ngai in an conglawm. A cang cuahmah liomi thilthar le thiltha ngai hmuh in kan hmuh.

A tak ahcun, mi tampi nih hin sualnak hrim hi zei ah kan rel ti lo. Relcawklo minung nih hin siasal a phunphun an biak cang. Nulepa sualnak a tuahmi, nupa sualnak zei a rel lomi, a firmi, a hak kaumi, zu a ri pengmi, innpa a huami le mi congoih a hmangmi zong an tam tuk. Mah sualnak hna hi kan i ngaihchih i kan kaltak lo ahcun Pathian baiceihnak caan tikah an i khat dih te ko lai. Pathian thinhunnak aa huah ding lawng te an si. “ A cheu cu cu bantuk cu nan si cang,” (1 Korin 6:11) tiah voi tampi zong a kan chimh. Khihfabu chungah kan um.

Asinain, zei bantuk sualnak hmanh hi sualnak a silo tiah mibu nih fak tuk in a tanh ka thei bel lo. Nupa sualnak cu mi tampi nih sualnak ah kan pom ko. Ramkhelrian a tuanmi hna caah hakhauh cu tlaknak a si. Fir zong a ho hmanh nih thilhman kan ti lo i mi thil a chutmi cu hawi nih kan hrial hna. Cun, tangka kong ah mi congoih a hmangmi cu thongthlaknak a i huah tawn. A bik in company ngan pipi ah.

American ahcun, hi sualnak pawl hi thil thalo ngai ah kan chiah hna nain nupa sualnak tu hi khamlo ding mi ah kan ruah men cang rua. Asinain, nu-le-nu le pa-le-pa sualnak tu cu a aupi cemtu mithang pawl nih thil thalo ah an rel lo. A tu lio chanthar nih cun phundang in a hmuh cang.

"Sualnak kha kan doh mi cu a si. Kan dirpi mi le kan doh mi hi kan i fian a hau."

Khirhfa kan caah cun, ngeihkhatsualnak pomnak nih, sualnak dang hna bantuk in, Bawipa Ram he a kan then tiah kan zumh. Cu caah sual a si tiah kan zumh tung ahcun, pawngkam nih an aupi tikah, holh loin kan um ding a si lo. Nunnak kong a si caah a biapi tuk. Khrihfa silo le hrinthan mi nih an doh ti men khi cu khuaruat loin chimmi a si. Donghnak a ngeilo mi Pathian lawmhnak he a kan than tu a simi sualnak poh cu kan doh dih hna. Atu ah hin kan pawngkam nih fir hi sual a si lo tiah dirkamh hna seh law Khrihfa nih kan doh hrimhrim lai. Sualnak kha kan doh mi cu a si. Kan dirpi mi le kan doh mi hi kan i fian a hau.

Ngeihkhatduhnak kong ah hin mibu pahnih lei in biaalnak a um. Pawngkam sining ruangah ngaihkhat thitumnak a tanh mi, an karh cuahmah, mibu hi kehlei (left group) bu an si i ngeihkhat thitumnak a hua mi, a khuaruatnak a bimi Khirhfa tiah ti mi, mibu hi orhlei (right group) bu an si. An hmuhning aa dang taktak. Kehlei bu nih ngeihkhat thitumnak a tanh lomi poh cu orhlei a tanhmi ah hmuh a si i orhlei pawl zong nih Ngeihkhat thitumnak a doh lomi poh cu a tanhmi in hmuh a si ve.

Asinain, Zumtu nih cun mah bu pahnih nih an chim bel lomi le an chim khawh lomi chim ding kan ngei. Ngeihkhat thitumnak cu kan tanh lo i, Pathian bia nih sualnak a si tiah a ti mi kha kan hngalh, a tanhmi zong kha kan hua hna lo. Anmah kan dawtnak hna cu pawngkam sining ruangah an tluklo nak hnga ding tu kha a si. “Kan dawt ko” le “A hman loh” ti hi a cawhnawk tuk lio caan ah hin biatak chung i a ummi dawtnak tu hi kan chimh hna. Kehlei bu kan si lo caah “a hman loh” kan ti hna. Orhlei bu zong kan si lo caah “Bawipa nih an dawt ko” kan ti hna. Bawipa nih vailam cungah a kan chimhmi—“Na palh ko nain kan dawt”—ti mi thawngtha hi kan chim.

Pathian nih mi vialte kan sual dih cio I sualnak maan cu thihnak a si, nawl ngaih lo cu Pathian thinhun biaceihnak an tong lai, i kanmah tlennak caah Khrih nih vailam ah chiatserhnak vialte a kan in piak ti cu Rom 3:23, Johan 3:36 le Galati 3:13 ah kan hmuh. Cun Rom 5:8 ah, “Asinain Pathian nih cun zeitluk in dah a kan dawt kha hitihin a langhter: kannih cu misual kan si rih ko lioah hin Khrih cu kan caah a thi.” 1 Peter 3:18, “zeicahtiah Khrih hrimhrim zong kha nanmah caah a thi…., nanmah cu Pathian sin I kalpi awk caah khan,…” Pathian thinhunnak ing ding kan si ko nain kan caah Khrih nih a kan in piaknak thawngin vancung khua i amah pennak i hrawm ve ding ah a kan sawn (Efesa 2:1-7).

“Kan ruahkhawh lengin kan sual nain a kan dawtnak hi kan i ruahchan khawhmi nak in a ngan deuh.”

Tim Keller nih a rak ton cangmi chungin a chimmi cu, “Kan ruahkhawh lengin kan sual nain a kan dawtnak hi kan i ruahchan khawhmi nak in a ngan deuh.” Zumtu zong nih kan chim dingmi cu “na palh ko nain Pathian nih an dawt thiam ko” ti hi a si. Kan pawngkam le minthang hna nih a kan doh caan ah, hip-hop hla pawl nih a kan soi lioah, kehlei bu le orhlei bu dirpi mi ruahnak pahnih lawng a um lio caan ah, a ho hmanh nih an chim lomi Pathian thawngtha tu hi mei bantukin kan ceuter ding a si. Kan caah Pathian dawtnak chimnak caan tha a si. Cu caah, ngeihkhatduhnak cu sualnak dang he aa khat lo tiah kan chim ding a si.

Note: Minneapolis, Minnesota ah a ummi Cities Church i an Pastor Jonathan Parnell nih a tialmi lehmi a si.