Khuasik le Cumpit-tlangrai 

October thla kan phak hin cun ahopoh nih kan theih ding cu Flu season (tlangrai) chung kan lut cuahmah cang caah i ralrin kan herh ti hi kan theih cio ding si. Laimi tam deuh cu kum chir tlangrai in a zawmi kan tam pi tawn caah siaherhnak he zeitin dah kan i ralrin deuh lai timi tlawmpel te keimah theih thawk in kan van share duh hna.

Seasonal influenza (tlangrai) zawtnak hi influenza viruses in a chuakmi a si i ngakchia bik in upa bik tiang nih ton khawhmi zawtnak a si. Cupinah a poi ngai mi cu minung pakhat hnu pakhat in i chonh khawh mi zawtnak a si. A fawinakbik in cun kut i tlaih nak te hmenh in i chonh khawh a si. Laimi tam deuh a hlei in nutung pawl hi kut tawl a dai thlang deuhmi tampi kan um. Nau diaper a zun lawng a si hmanh ah kan kut thiang te in tawl peng ding a si. Restroom kal hrim ah hin kut tawl ta lo a hmangmi laimi kan tam tuk. Kan hmuh khawh lomi Bacteria hi a tam tuk hringhran cun zawtnak a phunphun khamnak ding Le midang germs (zawt nak rungrul hmuh khawh lomi) chonh lonak ding ahcun kut tawl hi philhlo ding a si.

Tlangrai zawtnak hi zarh 2 in tam deuh a rau tawn. Sizung kal hau theng loin kan dam kho. Asinain, pregnant women (fa a pawi mi), children at aged 6 months to 5 years (hngakchia thla 6 in kum 5), elderly aged more than 65 years ( kum 65 cung pawl), asthma ngei mi, HIV/AIDS ngei mi, thin/lung zawt nak a ngei mi, ngandamnak lei i riantuan pawl nih hin cun hawi hlei in i ralrin a herh. Aruang cu zawtnak fakpi (severe illness) na tuar khawh cun thih nak tiang hmanh a chuah pi kho ve Flu zawtnak nih hin.

I ralrinnak dingah kan tuah a herhmi cu kan kut thiang te in i tawl peng ding, cun Flu a kham kho tu si (vaccine) kan i chunh ding a si. Walgreens, CVS, Target ah khan kal u law "I need a flu shot" ti u law an in chunh ko hna lai. A maan zong a fak tuk si lo $31-$40 na dih lai.